N1 Armorum et equitandi peritissimus, laboris ultra fidem patiens erat. In agmine nonnumquam equo, saepius pedibus anteibat, capite detecto seu sole seu imbre. Longissimas uias -centena passuum milia in singulos dies- incredibili celeritate confecit, expeditus, meritoria raeda. Interdum flumina eum morabantur; tunc Caesar nando uel inflatis utribus traiciebat. Sic persaepe nuntios de se praeueniebat.
In expeditionibus cautior an audentior fuit? Exercitum per insidiosa itinera umquam duxit, sed antea perspeculatus erat locorum situs. Exercitum in Britanniam transuexit, sed antea per se portus et nauigationem et accessum ad insulam explorauerat. Obsessio castrorum in Germania nuntiata est et idem per stationes hostium Gallico habitu penetrauit ad suos.
A Brundisio Dyrrachium inter oppositas classes hieme transmisit: Caesar copias accersiuerat, sed copiae non subsequebantur et cessabant; ideo nouissime ipse clam noctu, paruulum nauigium, solus, obuoluto capite conscendit, neque aduersae tempestati cessit. Paene obrutus est fluctibus. Tum demum quis esset detexit.
N2 Armorum et equitandi peritissimus, laboris ultra fidem patiens erat. In agmine nonnumquam equo, saepius pedibus anteibat, capite detecto, seu sol seu imber esset; longissimas uias incredibili celeritate confecit, expeditus, meritoria raeda, centena passuum milia in singulos dies. Interdum flumina eum morabantur; tunc Caesar nando uel inflatis utribus traiciebat. Sic persaepe nuntios de se praeueniebat.
In obeundis expeditionibus dubium est utrum cautior an audentior fuerit. Exercitum per insidiosa itinera unquam duxit, sed antea perspeculatus erat locorum situs. Neque exercitum in Britanniam transuexit, nisi antea per se portus et nauigationem et accessum ad insulam explorauisset. At idem, obsessione castrorum in Germania nuntiata, per stationes hostium Gallico habitu penetrauit ad suos.
A Brundisio Dyrrachium inter oppositas classes hieme transmisit, cessantibusque copiis, quas subsequi iusserat, ad accersendas frustra saepe miserat. Nouissime ipse clam noctu paruulum nauigium solus obuoluto capite conscendit, neque aduersae tempestati cessit. Paene obrutus est fluctibus. Tum demum quis esset detexit.
